အားရှိချင်သူများ သတိထား


ဝတ်ရည်အောင်
ဂျာနယ်၊ မဂ္ဂဇင်း အင်တာနက်စာမျက်နှာများတွင် လူငယ်၊ လူကြီးများအတွက် လိင်ပိုင်းဆိုင်ရာ လှုံ့ဆော်မှုပေးနိုင်သည့် ဆေးဝါးကြော်ငြာ
များ တဖြည်းဖြည်းများပြားလာကြောင်း အမျိုးသားအချို့ကဆိုသည်။
ယခင်က အင်္ဂလိပ်ဘာသာဖြင့်သာ ဖတ်ရှုနိုင်သော အင်တာနက်စာမျက်နှာများတွင်ပါ မြန်မာဘာသာဖြင့် ရေးသားထားသည့် ကြော်ငြာများ
ပိုမိုတွေ့လာရပြီး ထိုဆေးဝါးများကြောင့် ဒုက္ခရောက်သူများ ရှိသော်လည်း ထိုပြဿနာများအား ရင်ဆိုင်ပြီး အသုံးပြုနေသူ များပြားနေဆဲဖြစ်ကြောင်း ဒေါက်တာမြင့်ဦး(ဂျီပီ)က ပြော သည်။
လိင်ပိုင်းဆိုင်ရာ စွမ်းဆောင်မှု ပိုမိုရရှိရန် အသုံးပြုကြသော ထိုဆေးဝါးများကို အညွှန်းကောင်းကောင်းဖြင့် ရေးသားကြော်ငြာကြပြီး အိမ်ထောင်ရှင်အမျိုးသားများ၊ လူလတ်ပိုင်းနှင့် လူကြီးများ အသုံးပြုမှု ပိုမိုများပြားကြောင်း မျိုးဆက်ပွားဆိုင်ရာ ကျွမ်းကျင်သု တေသနပညာရှင်များနှင့် ဆရာဝန်များက ပြောသည်။

“လူငယ်တွေကတော့ နည်းနည်းကြောက်ကြတယ်။ အခု ဆေးခန်းမှာ တွေ့နေရတာတော့ လူလတ်ပိုင်းတွေ များတယ်။ အသက်(၂၅-၃၀) လောက်ကနေ
၅၀-၆၀တွေလည်း ပါတယ်” ဟု ဒေါက်တာမြင့်ဦးကပြောသည်။
မျိုးဆက်ပွားဆိုင်ရာ ကျန်းမာရေး မေးမြန်းနိုင်သည့် တယ်လီဖုန်းမေးမြန်းမှုများတွင်လည်း လိင်ပိုင်းဆိုင်ရာ ဆေးဝါးများနှင့် ပတ်သက်၍
မေးမြန်းမှုသည် အမေးများသည့် မေးခွန်းများတွင် ပါဝင်ကြောင်း မျိုးဆက်ပွားကျန်းမာရေးမှ တာဝန်ရှိသူတစ်ဦးက ပြောသည်။
“ဒီဆေးဝါးတွေကတော့ ဆေးပညာအရ စမ်းသပ်ထားတဲ့ စစ်ဆေးမှုတွေ မရှိထားတဲ့ ဆေးဝါးမျိုးပဲ။ သက်သေအခြေပြု ဆေးပညာထဲမှာ မပါဘူး” ဟု အင်တာနက်စာမျက်နှာတစ်ခုတွင် ဖော်ပြထားသည့် သဘာဝအမျိုးသား အားတိုးဆေးနှင့် အမျိုးသမီးများ အပျိုစင်ဘ၀ကို ပြန်လည်ရရှိလာနိုင်ကြောင်း
ကြော်ငြာထားသည့် ဆေးဝါးများနှင့်ပတ်သက်၍ ဒေါက်တာမြင့်ဦး(ဂျီပီ)ကပြောသည်။
ဆေးဝါးတစ်ခု ဈေးကွက်အတွင်း ဖြန့်ဖြူးခြင်းမပြုမီတွင် အဆင့်ဆင့်စမ်းသပ်မှုများဖြင့် ဆေး၏ သက်ရောက်မှု၊ ဘေးထွက်ဆိုးကျိုးစသည်တို့အား
နှစ်ပေါင်းများစွာစမ်းသပ်ပြီး သက်ဆိုင်ရာ ဆေးဝါးကွပ်ကဲမှုဌာနများ၏ ခွင့်ပြုချက်များဖြင့် ဖြန့်ချိရသော်လည်း ယခုဈေးကွက်အတွင်းရှိနေသည့်
ထိုလိင်ပိုင်းဆိုင်ရာ သက်ရောက်မှုရှိသည့် ဆေးဝါးများသည် ထိုအဆင့်များမပါရှိဘဲ အညွှန်းဖြင့် ရေးသားထားသည့် ဆေးဝါးများလည်း ပါဝင်ကြောင်း
သိရသည်။
စမ်းသပ်မှု မရှိထားသည့်အတွက် ဘေးထွက်ဆိုးကျိုးများ၊ ဆေးပမာဏများအား မသိရှိနိုင်ခြင်းကြောင့် အသက်သေဆုံးသွားသည့် လူများအပြင်
မမှန်ကန်သော ဆေးဝါးများအသုံးပြုကြခြင်းကြောင့် လိင်အင်္ဂါအစိတ်အပိုင်းများ ထိခိုက်သွားကြသူများလည်း များပြားကြောင်း ဒေါက်တာမြင့်ဦးက
ပြောသည်။

“အခု ဆိုးနေတာက အဲဒီလို လိမ်းဆေးသောက်ဆေးတွေထက် အင်္ဂါကြီးထွားအောင် ထိုးတဲ့ဆေးတွေကြောင့် ပြဿနာဖြစ်တာ ပိုများနေတယ်။
ပိုမိုသာယာမှုရမယ်ဆိုတဲ့ အထင်နဲ့ တစ်ယောက်နဲ့ တစ်ယောက် ညွှန်းပြီး လုပ်ကြတာကနေ တချို့တွေဆိုရင် လိင်အင်္ဂါကြွက်သားတွေ
ပျက်စီးကုန်တယ်။ အနာတွေဖြစ်ပြီး ပဲ့ထွက်ကုန်ပြီး ရောက်လာတဲ့သူတွေ များလာတယ်” ဟု ဒေါက်တာမြင့်ဦးက သူ၏အတွေ့အကြုံကို ပြောသည်။
အိမ်နီးချင်းနိုင်ငံများမှ ၀င်ရောက်လာသည့် ထိုဆေးများသည်လွန်ခဲ့သည့် နှစ်ပေါင်းများစွာကပင် ပြည်တွင်းသို့ ရောက်ရှိနေပြီး
စ၀င်လာသည့်အချိန်တွင် လူသုံးများခဲ့သော်လည်း ဆေး၏ဆိုးကျိုးများအား ပညာပေးရေးသားမှု များပြားခဲ့သဖြင့် အသုံးပြုမှုနည်းပါးခဲ့သော်လည်း
ယခုနှစ်ပိုင်းအတွင်း ပြန်လည်အသုံးများလာခြင်းဖြစ်ကြောင်း သိရသည်။ ရန်ကုန်မြို့လယ်တွင်ပင် အလွယ်တကူ ၀ယ်ယူနိုင်ပြီး ငွေကျပ်ထောင်ဂဏန်းမှ သောင်းဂဏန်းအထိ အကုန်ခံကာ အသုံးပြုနေကြသူများလည်းရှိသည်ဟု ဆိုသည်။
လိင်ပိုင်းဆိုင်ရာအတွက် အသုံးပြုသည့်ဆေးများသည်လည်း တစ်ဦးနှင့်တစ်ဦး ခံနိုင်ရည်ပေါ် မူတည်ပြီး ပမာဏအတိုးအလျှော့ဖြင့် အသုံးပြုရပြီး အမြဲမပြတ် ရေရှည်သုံးစွဲခြင်း မပြုသင့်သည့် ဆေးများဖြစ်သည့်အတွက် မိမိဘာသာအချိန်အဆမရှိ သုံးစွဲခြင်းမှ နောက်ဆက်တွဲအန္တရာယ်များ
ဖြစ်ပွားလာနိုင်သည်။ လူကြီးများတွင် အဖြစ်များသည့် ပန်းသေပန်းညှိုးခြင်းအတွက် အသုံးပြုသည့် ဆေးဝါးများ အချိန်အဆမမှန်ခြင်းကြောင့် အထူးသဖြင့် နှလုံးရောဂါအခံရှိသူများ၊ ဆီးကျိတ်ကြီးနေသည့်အတွက် ဆေးဝါးအသုံးပြုနေရသူများ သွေးပေါင်ကျဆင်းရာမှ အသက်ဆုံးရှုံးသွားခြင်း၊ လူငယ်များ သုက်လွှတ်မြန်သည့်အတွက် သုံးစွဲသည့်ဆေးဝါးများတွင် ပါဝင်သည့် အရာများကြောင့် ဦးနှောက်ပိုင်းဆိုင်ရာ ထိခိုက်မှုများ ဖြစ်ပွား လာနိုင်ကြောင်း မျိုးဆက်ပွားကျန်းမာရေးသုတေသနပြုလုပ်နေသူ တစ်ဦးက ပြောသည်။
“လူငယ်တွေ အသုံးပြုကြတဲ့ ဆေးတွေဆိုလည်းသူက သုက်ထွက်မြန်တာကို ပြုပြင်ဖို့ ဦးနှောက်ကို ပြုပြင်တဲ့ ဆေးဝါးမျိုးတွေဖြစ်တယ်။ မသုံးတတ်ဘဲ
သေချာ ဆေးပမာဏ မရှိဘဲ သုံးတာများရင် ဦးနှောက်ပိုင်းဆိုင်ရာတွေ ပြဿနာဖြစ်တယ်” ဟု အဆိုပါ သုတေသနပညာရှင်က ပြောသည်။
လိင်ပိုင်းဆိုင်ရာ ကျေနပ်မှု ရရှိရန်အတွက် ဆေးဝါးများ အသုံးပြုခြင်းထက် မိမိတို့၏ ပြဿနာများအား ရှေးဦးစွာ ဆန်းစစ်၍ အပြုအမူများ ပြောင်းလဲခြင်းက ပိုမိုသင့်လျော်ပြီး ဘေးထွက်ဆိုးကျိုးရှိသည့် ဆေးဝါးအား နောက်ဆုံးအခြေအနေမှသာ ဆရာဝန်ညွှန်ကြားချက်ဖြင့် အသုံးပြုသင့်
ကြောင်း သိရသည်။
လိင်စိတ်တက်ကြွစေရန် အသုံးပြုသည့် ဆေးဝါးများသည် နှစ်ပေါင်းများစွာကတည်းက လူသုံးများကြသည့် ဆေးဝါးများဖြစ်ပြီး နိုင်ငံအလိုက်
အနောက်တိုင်းဆေးဝါးများအပြင် တိုင်းရင်းဆေးများလည်း နည်းအမျိုးမျိုးဖြင့် အသုံးပြုကြသည်။
တိုင်းရင်းဆေးဝါးများသည်လည်း အနောက်တိုင်းဆေးဝါးများကဲ့သို့ ကောင်းကျိုး၊ ဆိုးကျိုးများ သေချာလေ့လာမှုမရှိသည့် ဆေးဝါးများဖြစ်ပါက
နောက်ဆက်တွဲ ဆိုးကျိုးများ ဖြစ်ပွားလာနိုင်သည်။
“အဲဒီလိုတိုင်းရင်းဆေးတွေက ပိုတောင်အန္တရာယ်ရှိသေးတယ်။ အင်္ဂလိပ်ဆေးကမှ ပါတဲ့ပစ္စည်းတွေကို သေချာဖတ်ရင် ဘယ်လောက်
အတိုင်းအတာအထိပဲ သောက်သင့်တယ်။ ဘယ်လိုလူတွေမသောက်သင့်ဘူးဆိုတာ သိတဲ့သူက ပြောဦးမယ်။ တိုင်းရင်းဆေးမှာတော့
ပါဝင်တဲ့ပစ္စည်းတွေက ဘယ်သူတွေနဲ့မသင့်တော်ဘူးဆိုတာ ပြောဖို့ နည်းနည်းတော့ခက်တယ်” ဟု အဆိုပါ သုတေသနပညာရှင်ကပြောသည်။
လိင်မှုနှင့်လိင်ကိစ္စအတွက် အသုံးပြုသည့် ဆေးဝါးများ ပြဿနာသည်သာမဟုတ်ဘဲ အရက်၊ မူးယစ်ဆေးဝါးတို့သည်လည်း ဆက်စပ်နေပြီး
လိင်ပိုင်းဆိုင်ရာကိစ္စများကြောင့် လူမှုရေးပြဿနာများ ရောဂါများပါ နောက်ဆက်တွဲပါဝင်လာနိုင်သည်ကိုလည်း ထည့်သွင်းစဉ်းစားရန် လိုအပ်သည်။
မျိုးဆက်ပွားကျန်းမာရေးနှင့်ပတ်သက်၍ ဆယ်ကျော်သက်ဖွံ့ဖြိုးမှုဆိုင်ရာ သုတေသနပြုလုပ်ရာတွင် လူငယ်များ၌ အိမ်ထောင်မပြုမီ လိင်ပိုင်းဆိုင်ရာ ကျူးလွန်မှုများ ပိုများလာကြောင်း လေ့လာတွေ့ရှိထားပြီး ထိုပြဿနာသည် လူငယ်များတွင် ရည်မှန်းချက်ပန်းတိုင် မရှိခြင်း၊ ပညာရေးစနစ်ကောင်းခြင်း၊
ကောင်းမွန်သည့် အပေါင်းအသင်းမရှိခြင်း၊ အားကစားလှုပ်ရှားမှုများ နည်းပါးခြင်းနှင့် အုပ်ထိန်းမှုစနစ်တကျမရှိခြင်း စသည့်
အကြောင်းအရာများနှင့်လည်း ဆက်စပ်နေကြောင်း ထိုသုတေသနတွင် ပါဝင်ခဲ့သူတစ်ဦးကပြောသည်။
“လိင်မှုကိစ္စဆိုတာ လူငယ်ပိုင်းဆိုင်ရာမှာသိပ်များနေတာ ကောင်းတဲ့လက္ခဏာမဟုတ်ဘူး။ ပညာရေး၊ အားကစား၊ ပေါင်းသင်းဆက်ဆံရေး၊ အုပ်ထိန်းမှုပုံစံစတဲ့ အချက်တွေ ချို့ယွင်းလာရင် လိင်ကိစ္စဘက်မှာများလာတယ်။ အရင်က သုတေသနလုပ်ထားတာမျိုး မရှိတဲ့အတွက်
အခုဘယ်လောက်အထိ များလာလဲမသိနိုင်ပေမယ့် သုတေသနအရ လူငယ်တွေနဲ့ စကားပြောတဲ့အခါတော့ လက်မထပ်ခင် အတူတူနေတာမျိုး
များနေတယ်” ဟု ထိုပညာရှင်က ပြောသည်။
“အခုဆိုရင် Sex နဲ့ တွဲလာတဲ့ မူးယစ်ဆေးဝါးတွေကလည်း များလာပြီ။ ဘယ်လောက်ပဲထိန်းထိန်း အရင်က နယ်စပ်တွေမှာပဲ ပေါများတဲ့ ဆေးဝါးတွေက
အခုဆိုရင် ရန်ကုန်မြို့ကြီးတွေမှာလည်း တွင်ကျယ်လာပြီ။ အမျိုးသား အမျိုးသမီးတွေလည်း သုံးလာကြပြီ” ဟု အဆိုပါသူက ဆက်လက်ပြောသည်။
ထိုပြဿနာများ နည်းပါးလာစေရန် ပညာရေးစနစ်ကောင်းမွန်နေစေရန်နှင့် လူငယ်များတွင် ဘ၀အတွက် ရည်မှန်းချက်ပန်းတိုင်များရှိစေရန်၊
အပေါင်းအသင်းကောင်းများ၊ အားကစား၊ အုပ်ထိန်းမှုကောင်းမွန်မှုများအတွက် ဖန်တီးပေးရန် လိုအပ်ပြီး ပြည်တွင်းရှိ အစိုးရအဖွဲ့အစည်းများ
နိုင်ငံတကာမှ အစိုးရမဟုတ်သော အဖွဲ့အစည်းများက လူငယ်များကိုသာမက အုပ်ထိန်းသူများကိုပါ ပညာပေးဟောပြောမှုများပါ ဆောင်ရွက်လျက်
ရှိကြောင်းသိရသည်။
ဘ၀ရည်မှန်းချက် ရှိသည့်အခါ ရည်မှန်းချက် လွဲချော်သွားစေမည့် အပြုအမူများအား ဆင်ခြင်လာစေခြင်းဖြင့် လိင်ကိစ္စရပ်များ လျော့နည်းလာနိုင်သည့်အပြင် အမျိုးသမီးများတွင်လည်း မိမိချစ်သူ ရည်းစားအား မိမိမဖြစ်စေချင်သည့် အဆင့်များအတွက် ငြင်းနိုင်သည့်
အရည်အသွေးများ ပြည့်ဝလာစေရန် လေ့ကျင့်ပေးမှုများလည်း အဆိုပါ အဖွဲ့အစည်းများက ဆောင်ရွက်လျက်ရှိသည်။
သို့ဖြစ်ရာ လိင်ပိုင်းဆိုင်ရာ လှုံ့ဆော်မှုနှင့်ပတ်သက်သည့် ဆေးဝါးများ အလွယ်တကူ ရရှိလာခြင်းကြောင့် စမ်းသပ်သုံးစွဲလိုသည့် လူငယ်များ၊
လိင်စိတ်လွန်ကဲသူများအကြား ကျန်းမာရေးအသိရှိရန်မှာ များစွာလိုအပ်လှပေသည်။
                                                    
 
Back to Top